မြန်မာနိုင်ငံပြသနာကို ကုလအတွင်းရေးမှူးချုပ် ပိုပြီးဖိအားပေးလုပ်ဆောင်ဖို့ တောင်းဆို


မြန်မာနိုင်ငံပြသနာကို ကုလအတွင်းရေးမှူးချုပ် ပိုပြီးဖိအားပေးလုပ်ဆောင်ဖို့ တောင်းဆို

မြန်မာနိုင်ငံမှာ ဖြစ်ပေါ်နေတဲ့ ပဋိပက္ခတွေ ပြေလည်ရေးအတွက် ကုလသမဂ္ဂအတွင်းရေးမှူးချုပ်အနေနဲ့ သံတမန်ရေးအရ ပိုမို ဖိအားပေး လုပ်ဆောင်ဖို့ နိုင်ငံတကာကလူ့အခွင့်အရေးအဖွဲ့တွေ တိုက်တွန်း ပြောကြားလိုက်ကြပါတယ်။


ဖေဖော်ဝါရီလ ၁ ရက်နေ့မှာ စစ်တပ်က အာဏာသိမ်းပြီးတဲ့နောက်ပိုင်း ဖြစ်ပေါ်လာတဲ့ ဘာသာရေးနဲ့ တခြားလွတ်လပ်ခွင့်တွေ ချိုးဖောက်ခံနေရတဲ့ကိစ္စတွေကို အတွင်းရေးမှူးချုပ် Antonio Guterres အနေနဲ့ အလေးပေး ဆောင်ရွက်ပေးဖို့ အောက်တိုဘာ ၂၀ ရက်၊ ဗုဒ္ဓဟူးနေ့ရက်စွဲနဲ့ လူ့အခွင့်အရေး အဖွဲ့အစည်းပေါင်း ၉၇ ဖွဲ့နဲ့ လူပုဂ္ဂိုလ် ၁၅ ဦးတို့က လက်မှတ်ထိုးပြီး တောင်းဆိုထားကြတာပါ။


လက်မှတ်ထိုးတဲ့အထဲပါဝင်တဲ့ Christian Solidarity Worldwide နဲ့ Christian Freedom International အဖွဲ့ တို့ကလည်း ပြည်တွင်း နေရပ်စွန့်ခွာ ထွက်ပြေးနေကြရတဲ့ တိုင်းရင်းသားတွေနဲ့ ဘာသာရေးလူနည်းစုတွေအတွက် နိုင်ငံတကာအသိုင်းအဝိုင်းက လူသားချင်းစာနာမှုအကူအညီတွေ တိုးမြင့် ကူညီပေးကြဖို့ တိုက်တွန်းထားပါတယ်။


မြန်မာစစ်တပ်ဟာ စစ်အာဏာသိမ်းမှုနဲ့ အဲဒီရဲ့နောက်ဆက်တွဲ ဖြစ်ပေါ်လာတဲ့ ဖိနှိပ်ချုပ်ခြယ်မှုတွေနဲ့ စီးပွားရေး ကျဆင်းမှုတွေကို အာရုံလွှဲဖို့ ကြိုးစားတဲ့အနေနဲ့ ဗုဒ္ဓဘာသာတွေနဲ့ တခြားဘာသာကွဲတွေအကြား အမုန်းတရား တိုးပွားလာအောင် ဝါဒဖြန့် ပြောဆိုမှုတွေ ရှိလာနိုင်တဲ့အပေါ် အထူး စိုးရိမ်ပူပန်ကြောင်းလည်း လူ့အခွင့်အရေးအဖွဲ့တွေ ရေးသားထားတဲ့စာထဲမှာ ဖော်ပြထားပါတယ်။


မြန်မာစစ်တပ်က ကယားပြည်နယ်အတွင်း ကက်သလစ် ခရစ်ယာန် တရားဟောဆရာတဦးကို မကြာသေးခင်က သတ်ဖြတ်ခဲ့တဲ့ကိစ္စ၊ ၂၀၁၇ ခုနှစ်မှာ ရိုဟင်ဂျာတွေကို အစုလိုက်အပြုံလိုက် သတ်ဖြတ်ခဲ့တဲ့ကိစ္စတို့ကိုလည်း စာထဲမှာ ရေးသားဖော်ပြထားပြီး မြန်မာစစ်တပ်အနေနဲ့ အဲဒီလို လူ့အခွင့်အရေးချိုးဖောက်တဲ့လုပ်ရပ်တွေကို ချက်ခြင်းရပ်တန့်ဖို့ တောင်းဆိုထားပါတယ်။