အိန္ဒိယမှာ တားမြစ်ချက်မလိုက်နာသူတွေ ရဲက ရိုက်နှက်အပြစ်ပေး (ရုပ်သံ)

2020-03-26 21:12:14


အိန္ဒိယမှာ တားမြစ်ချက်မလိုက်နာသူတွေ ရဲက ရိုက်နှက်အပြစ်ပေး (ရုပ်သံ)

အိန္ဒိယမှာ တားမြစ်ချက်မလိုက်နာသူတွေ ရဲက ရိုက်နှက်အပြစ်ပေး


အိန္ဒိယနိုင်ငံမှာ ကိုရိုနာဗိုင်းရပ်စ်ကူးစက်မှုတွေကို ထိန်းချုပ်ဖို့အတွက် တနိုင်ငံလုံးအတိုင်းအတာနဲ့ အပြင်မထွက်ဘဲ နေကြဖို့ ချမှတ်ထားတဲ့ စည်းကမ်းတွေကို မလိုက်နာဘဲ ချိုးဖောက်တဲ့သူတွေကို အိန္ဒိယရဲတပ်ဖွဲ့က မနေ့က နံပါတ်တုတ်တွေနဲ့ ရိုက်နှက်တာတွေ တခြားအပြစ်ပေးတာတွေ လုပ်ခဲ့ပါတယ်။ အိန္ဒိယနိုင်ငံ ကိုရိုနာဗိုင်းရပ်စ်ကူးစက်မှုတွေကို ထိန်းချုပ်တဲ့ အနေနဲ့ ၂၁ ရက်ကြာ အပြင်မထွက်ကြဖို့ ဝန်ကြီးချုပ် နရင်ဒရာမိုဒီက မတ်လ ၂၄ ရက်နေ့ အမိန့်ထုတ်ပြန်ခဲ့တာဖြစ်ပါတယ်။

မရှိမဖြစ် အရေးပေါ်ဝန်ဆောင်မှုပေးနေတဲ့ သူတွေကလွဲရင် ကျန်တဲ့သူတွေကို တနေရာကနေ တနေရာကို မသွားနိုင်အောင် တားဆီးတဲ့အနေနဲ့ ရဲတွေက လမ်းတွေကို သံဆူးကြိုးတွေနဲ့ ပိတ်ပြီး ကားတွေကို ရပ်တန့်စစ်ဆေးတာတွေ လုပ်နေပါတယ်။ ဒါ့အပြင် Mumbai, Nagpur နဲ့ Mau မြို့တွေမှာတော့ စည်းကမ်းချိုးဖောက်တဲ့သူတွေကို ထိုင်ထလုပ်ခိုင်းတာ၊ ဒိုက်ထိုးခိုင်းတာတွေ လုပ်ပြီး အပြစ်ပေးနေပါတယ်။ အိန္ဒိယနိုင်ငံမှာ အခုလို အပြင်မထွက်ရဘူးလို့ အမိန့်ထုတ်လိုက်တာကြောင့် လူတွေဟာလည်း ဈေးဆိုင်တွေမှာ အလုအယက်စုပြုံတိုးပြီးတော့ ဝယ်ခဲ့ကြပါတယ်။


မြို့တော်ဒေလီမှာတော့ အစိုးရက ဆင်းရဲနွမ်းပါးပြီး အစားအစာ မရှိတဲ့သူတွေနဲ့ နေ့စားအလုပ်သမားတွေကို အစားအသောက်တွေ ဝေပေးနေပါတယ်။ အိန္ဒိယနိုင်ငံမှာ ကိုရိုနာဗိုင်းရပ်စ် ကူးစက်ခံရသူ ၅၂၆ ယောက်တွေ့ရှိပြီး သေဆုံးတဲ့သူ ၁၁ ယောက်ရှိခဲ့တာကြောင့် အိန္ဒိယအစိုးရက မတ်လ ၂၅ ရက် မနေ့ကစပြီး တနိုင်ငံလုံးအတိုင်းအတာနဲ့ ၃ ပတ်ကြာ အပြင်မထွက်ဖို့ အမိန့်ထုတ်လိုက်တာဖြစ်ပါတယ်။ တရုတ်၊ အီတလီ နဲ့ စပိန်နိုင်ငံတွေထက်စာရင် အိန္ဒိယနိုင်င့မှာ ကိုရိုနာဗိုင်းရပ်စ်ကူးစက်ခံရမှုဟာ သိပ်မပြောပလောက်ပေမဲ့ ကမ္ဘာပေါ်မှာ လူဦးရေ ဒုတိယအများဆုံးနိုင်ငံဖြစ်တဲ့ အိန္ဒိယနိုင်ငံအနေနဲ့ စည်းမျဉ်းစည်းကမ်းတွေကို တင်းတင်းကြပ်ကြပ် မလုပ်ဘူးဆိုရင် ရောဂါကူးစက်ခံရတာတွေ အကြီးအကျယ် ဖြစ်လာနိုင်တယ်လို့ ဝန်ကြီးချုပ်မိုဒီနဲ့ ကျန်းမာရေးတာဝန်ရှိသူတွေက သတိပေးလိုက်ပါတယ်။



VOA Burmese News