တအိအိကျဆင်းလာနေတဲ့ ပြည်တွင်း အခေါက်ရွှေဈေး အခြေအနေ


တအိအိကျဆင်းလာနေတဲ့ ပြည်တွင်း အခေါက်ရွှေဈေး အခြေအနေ

တစ်ကျပ်သားကို ငွေကျပ် ၂၂သိန်းအထိ စံချိန်တင်တက်ခဲ့တဲ့ အခေါက်ရွှေဈေးဟာ ငွေကျပ် ၁၈သိန်းအထိ တအိအိကျဆင်းသွားပြီး ယနေ့ နိုဝင်ဘာ ၂၅ ရက်အရောက်မှာတော့ အခေါက်ရွှေတစ်ကျပ်သားကို ၁၇၇၀၀၀၀ ကျပ်ထိ ကျဆင်းလာတာတွေ့ရပါတယ်။


ကမ္ဘာ့ရွှေစျေးမှာ နိုဝင်ဘာ ၂၃ ရက်နေ့က တစ်အောင်စကို ၁၈၀၈ ဒေါ်လာရှိခဲ့ပြီး ယနေ့ နိုဝင်ဘာ ၂၅ ရက်နေ့မှာတော့ တစ်အောင်စကို ၁၇၉၃ ဒေါ်လာထိ ကျဆင်းလာတာတွေ့နေရပါတယ်။


ရွှေကုန်သည်တစ်ဦးက ”အခေါက်ရွှေဈေးဟာ တစ်ကျပ်သားကို ငွေကျပ်တစ်ဆယ့်ရှစ်သိန်းပါတ် ချာလည် ဈေးရှိနေတာ ၁ လခွဲကာလရှိနေပြီး အခု ငွေကျပ် တစ်ဆယ့်ရှစ်သိန်းအောက်ကို တဖြည်းဖြည်းဆက်ကျနေတာ၊ ကမ္ဘာ့ရွှေဈေးဟာလည်း အခုရက်ပိုင်းအတွင်း အနည်းငယ်ကျဆင်းနေတာရှိတယ်လို့”ပြောပါတယ်။


ရွှေအရောင်းအဝယ်ပြုလုပ်နေသူတစ်ဦးက ”အရောင်းအဝယ်က ပုံမှန်ပဲ ရွှေဈေးအတက်အကျကြမ်းတဲ့ကာလတွေတုန်းကနဲ့ပြောမယ်ဆိုရင် အတော်လေးကျသွားတယ်လို့ ပြောလို့ ရတယ်လို့”ပြောပြပါတယ်။


ပြည်တွင်းငွေလဲနှုန်းဟာဆိုရင် နိုဝင်ဘာ ၂၄ ရက်နေ့က ကန်တစ်ဒေါ်လာ ဝယ်စျေး ၁၇၉၀ ကျပ်နှင့် ရောင်းစျေး ၁၇၉၂ ကျပ်ရှိနေပြီး ဗဟိုဘဏ်ရည်ညွန်းငွေလဲနှုန်းမှာ ကန်တစ်ဒေါ်လာ ၁၇၈၈.၃ ကျပ်သတ်မှတ်ထားတာတွေ့ရပါတယ်။