ပလက်ဝနဲ့ ရခိုင်သုံးမြို့နယ်တိုက်ပွဲ ၁၀ ရက်ကျော်ထိ ပြင်းထန်ဆဲ

2020-02-20 11:26:46


ပလက်ဝနဲ့ ရခိုင်သုံးမြို့နယ်တိုက်ပွဲ ၁၀ ရက်ကျော်ထိ ပြင်းထန်ဆဲ

ပလက်ဝနဲ့ ရခိုင်သုံးမြို့နယ်တိုက်ပွဲ ၁၀ ရက်ကျော်ထိ ပြင်းထန်ဆဲ


ပလက်ဝမြို့နယ်နဲ့ ရခိုင်မြို့နယ် မြို့နယ်သုံးခုထက်မနည်းမှာ တိုက်ပွဲတွေဖြစ်နေတာ ၁၀ ရက်ကျော်လာပြီဖြစ်ပြီး အပြင်းအထန် ဆက်ဖြစ်နေဆဲပါ။ တိုက်ပွဲရန်ကနေ ဘေးလွတ်ရာ ထွက်ပြေးရသူ အရပ်သားအရေအတွက် ပိုတိုးလာသလို တိုက်ပွဲအတွင်း ပိတ်မိနေသူတွေလည်း ရှိပါတယ်။ ဒီအကြောင်း ဗွီအိုအေသတင်းထောက် ကိုသက်နိုင်က သတင်း ပေးပို့ထားပါတယ်။ ချင်းပြည်နယ်၊ ပလက်ဝမြို့နယ်က အောက်မီးလက်ဝ ကျေးရွာအနီးမှာ အစိုးရတပ်နဲ့ ရခိုင်လက်နက်ကိုင် AAအဖွဲ့တို့ကြား ဖေဖော်ဝါရီလဆန်းပိုင်းက စတင်ပြီး မနေ့ကအထိ တိုက်ပွဲအပြင်းအထန် ဖြစ်ပွားနေ တယ်လို့ AAအဖွဲ့ပြောခွင့်ရ ခိုင်သုခ က ပြောပါတယ်။ “မနေ့က ပလက်ဝမြို့နယ် မီးချောင်းတံတား ထိပ်က ဗျုဟာကုန်းမှာတော့ ၁၃ရက်နေ့မြောက်ဖြစ်တာ တိုက်ပွဲက တော့ ဆက်ပြီးတော့ အချိန်မြင့်လာတယ်။ အဲဒီဗျုဟာကုန်းကို လူအင်အား၊လက်နက်အင်အား ဖြည့်တင်းနိုင်ဖို့ မြန်မာ စစ်တပ်ဘက်ကနေ နေရာ ၄ခုလောက်နေပြီးတော့ ထိုးဖောက်ဖို့ ကြိုးစားနေတာရှိတယ်။ အဲတာကြောင့် အဲဒီဖက်မှာ ကျနော်တို့ ဖြတ်တောက်ရေး တပ်နဲ့ မြန်မာ စစ်ကူစစ်ကြောင်းတွေ ကြားမှာ တိုက်ပွဲ ပြင်းပြင်းထန် ထန်ဖြစ်နေတာရှိတယ်။” မနေ့က ဖြစ်ပွားခဲ့တဲ့ ပလက်ဝမြို့နယ် မီချောင်းတံတား တိုက်ပွဲအတွင်းမှာ အောက်မီးလက်ဝ ကျေး ရွာက ခြောက်တန်းကျောင်းသားတစ်ဦး လက်နက်ကြီးကျည်ထိမှန်ပြီး ဆေးရုံတင်ထားရတယ်လို့ ပလက်ဝမြို့နယ် စစ်ဘေးရှောင်ကူညီရေးအဖွဲ့က ဦးအောင်ကျော်ထင်ပါကပြောပါတယ်။


“ရွာရဲ့အနီးဝန်းကျင်မှာ လက်နက်ကြီးတွေ ကြားတယ်။ သူတို့က တော်တော်လေးကြောက်နေကြတယ်။ ပလက်ဝရဲ့ အနီးဝန်းကျင်မှာ လက်နက်ကြီး အသံတွေ ကြားနေရတယ်။ အဓိက လက်နက် ကြီးတွေနဲ့ ပစ်ခတ်မှုတွေ ရှိတော့ဒီ ပလက်ဝရဲ့ တစ်ဖက်ကမ်း အောက်မီးလက်ဝ ကျေးရွာမှာ ခြောက်တန်းကျောင်းသား တစ်ဦးရဲ့ ခေါင်ပေါ်ကို လက်နက်ကြီးကျည်စ ထိမှန်ပြီး ဆေးရုံတင် ထားရတယ်။ ဒီဒေသမှာ ဖေဖော်ဝါရီလ ဆန်းပိုင်းကတည်းက မနေ့ကအထိ တိုက်ပွဲတွေ ပြင်းထန် နေတာကြောင့်ဒေသခံတွေ ထွက်ပြေးနေကြရတယ်လို့လည်း သူက ပြောပါတယ်။ ပလက်ဝမြို့နယ် အပြင် ရခိုင်မြောက်ပိုင်းက ကျောက်တော် အမ်းနဲ့ ဘူးသီးတောင် မြို့နယ်တွေမှာလည်း အစိုးရတပ်နဲ့ ရခိုင်လက်နက်ကိုင် AAအဖွဲ့တို့ တိုက်ပွဲအပြင်းအထန်ဖြစ်ပွားနေတယ်လို့ AAပြောခွင့်ရ ခိုင်သုခက ပြောပါတယ်။ “နောက်ပြီးတော့ ကျောက်တော်မြို့နယ် ဝက်မကျရွာနဲ့ တင်းမရွာကြားမှာ တ၁၂ရက်မြောက် တိုက်ပွဲ အပြင်းအထန်ဖြစ်နေတာ ရှိတယ်။ နောက်တစ်နေရာက ဘူးသီးတောင်မြို့နယ် မာန်အောင်ရွာရဲ့ အရှေ့မြောက်ဖက် ၁ကီလိုမီတာလောက်အကွာမှာ နာရီဝက်လောက်ကြာအောင် တိုက်ပွဲ ဖြစ်ပွားခဲ့တာ ရှိတယ်။ အဲဒီမှာ မြန်မာစစ်တပ်ဘက်ကနေပြီးတော့ စစ်သေနတ်တွေ လက်နက်ကြီးတွေနဲ့ ရမ်းပစ်ခတ်တာရှိတယ်။ ရဟတ်ယာဉ်တွေနဲ့ ၁၀မိနစ်လောက်လာ ပစ်တာရှိတယ်။ နောက်တစ်ခုကတော့ အမ်းမြို့နယ် လေးအိမ်စုမှာ နှစ်ဖက်အပြန်အလှန် ၃နာရီလောက် တိုက်ပွဲအပြင်း အထန် ဖြစ်တာရှိတယ်။ မနေ့က တိုက်ပွဲမှာ ရန်သူဘက်က ၅ဦးကျဆုံးပြီးတော့ ကျနော်တို့ဘက်က ၂ဦးကျဆုံးတာရှိတယ်။”

ရခိုင်မြောက်ပိုင်းနဲ့ ချင်းပြည်နယ် ပလက်ဝမြို့နယ်တွေမှာ တိုက်ပွဲတွေ ပြင်းထန်နေတာကြောင့် အရပ်သား ထိခိုက်သေဆုံး ဒဏ်ရာရတာတွေနဲ့ နေရပ်စွန့်ခွာ ထွက်ပြေးနေရသူတွေ တနေ့ထက် တနေ့ များပြားလာ တာလည်းဖြစ်ပါတယ်။ ဒါ့အပြင် ကျောက်တော်နဲ့ ပလက်ကို ပြေးဆွဲနေတဲ့ ရေလမ်းခရီးကို ပိတ်ထားကြောင့် ကျောက်တော်မြို့နယ်မှာ ရန်ကုန်ကနေပြန်လာကြတဲ့ ပလက်ဝ ဒေသခံ ၂၀၀နီးပါး ပိတ်မိနေတယ်လို့ ချင်းပြည်နယ် အစိုးရအဖွဲ့ပြောခွင့်ရ စည်ပင်သာယာရေးဝန်ကြီး ဦးစိုးထက်က ပြောပါတယ်။ “ဒီလဆန်း ၅ရက်နေ့ကတည်းက တိုက်ပွဲတွေ ဆက်တိုက်ဖြစ်တဲ့ အခါကျတော့ စက်လှေ အတက်အဆင်း ကို တားတာေ ပါ့နော်။ မတက်ခိုင်းတာတွေ လုပ်တာပေါ့နော်။ အခု ကျောက်တော်မှာ ကျနော်တို့ဆီက စက်လှေက ၈စီးလောက် တက်လို့မ ရပဲ ဖြစ်နေတယ်။ လူတွေကလည်း ရန်ကုန်ဘက်ကနေ ပလက်ဝဘက်ကို ပြန်လာမယ့် သူတွေ ၂၀၀ လောက် သောင်တင် နေတယ်။ ဟိုတစ်နေ့ကလည်း စက်လှေတစ်စီး တက်လာတော့ ဟိုဘက်က ပစ်တော့ ပြန်ဆင်းသွားရတယ်။ အမှန်ကတော့ တပ်နဲ့ အေအေနဲ့တိုက်ပွဲ ဖြစ်တာ ကိုတော့ မတတ်နိုင်ဘူး။ ဒါပေမယ့် ပြည်သူလူထု ရေလမ်းကြောင်းကိုတော့ နှစ်ဖက်လုံးက လွတ်ပေးဖို့ကောင်းတယ်။” ရခိုင်မြောက်ပိုင်းနဲ့ ချင်းပြည်နယ်၊ ပလက်ဝဖက်မှာ တိုက်ပွဲတွေ ပြင်းထန်နေတာနဲ့ ပတ်သတ်ပြီး တပ်မတော်ဘက် က ပြောခွ င့်ရသူတွေကို ဗွီအိုအေက ဆက်သွယ်ခဲ့ပေမယ့်လည်း အကြောင်းတစ်စုံတစ်ရာ မရရှိခဲ့တာလည်း ဖြစ်ပါတယ်။ ရခိုင်မြောက်ပိုင်းနဲ့ ချင်းပြည်နယ် ပလက်ဝမြို့နယ်တွေမှာ အင်တာနက်လိုင်းတွေလည်း ဖြတ်တောက်ထားသလို တိုက်ပွဲတွေ ပြင်းထန်နေတာကြောင့် အိုးအိမ်စွန့်ခွာထွက်ပြေးနေကြရတဲ့ စစ်ဘေးဒုက္ခသည်တွေဟာ တစ်နေ့ တစ်နေ့ပိုမိုများလာနေတာလည်း ဖြစ်ပါတယ်။ VOA Burmese News