နှစ်ပတ်အတွင်း ငွေတိုက်စာချုပ်ရောင်းရငွေ ဒေါ်လာ ၃ ဒသမ၆သန်းခန့်ရရှိ


နှစ်ပတ်အတွင်း ငွေတိုက်စာချုပ်ရောင်းရငွေ ဒေါ်လာ ၃ ဒသမ၆သန်းခန့်ရရှိ

နှစ်ပတ်အတွင်း ငွေတိုက်စာချုပ်ရောင်းရငွေ အ​မေရိကန် ဒေါ်လာ ၃ ဒသမ ၆သန်းခန့်ရောင်းချနိုင်ခဲ့ကြောင်း အမျိုးသားညီညွတ်ရေးအစိုးရ၊စီမံကိန်း၊ ဘဏ္ဍာရေးနှင့် ရင်းနှီးမြှုပ် နှံမှုဝန်ကြီးဌာနက ယနေ့(ဇန်နဝါရီ ၁၅ ရက်) တွင် ကြေညာသည်။


“ကျွန်​တော်တို့ ငွေတိုက်စာချုပ်တွေကို အခု ပြန်ရောင်းနေတာ ၂ ပတ် ရှိသွားပါပြီ။ (အခြေအနေအရ) အရင်လို အုတ်အော်သောင်းနင်း ကြော်ငြာပြီး မရောင်းပေမယ့် ၂ ပတ်အတွင်းမှာ ဒေါ်လာ ၃.၆ သန်းနီးပါး ရောင်းချနိုင်ခဲ့ပါတယ်”ဟု NUG ဝန်ကြီး ဦးတင်ထွန်းနိုင်က ပြောသည်။



၎င်းက ဆက်လက်၍ “ပြည်သူတွေ အားထည့်ဝယ်ယူထားတဲ့ တစ်ကျပ်တစ်ပြားကစလို့ လုံးဝ အလဟသမဖြစ်သလို အလေလွင့်အဆုံးအရှုံးလည်း မရှိဘူးဆိုတာကို တော်လှန်ရေးသစ္စာနဲ့ ကျွန်​တော်တို့လုံးဝ တာဝန်ယူ၊တာဝန်ခံပါတယ်”ဟု ကတိပြုသည်။


ငွေတိုက်စာချုပ်မှတစ်ဆင့်ရရှိငွေများသည် ယခင်ကထက် ပိုမိုထိရောက်သော တော်လှန်ရေးလိုအပ်ချက်ကို ဖြည့်ဆည်းပေး နိုင်လျက်ရှိနေပြီဟုလည်း ကြေညာချက်ကဆိုသည်။


လက်ရှိအခြေအနေအရ ပွင့်လင်းမြင်သာစွာ အသိပေးချပြနိုင်ခြင် မရှိနိုင်သေးသည်ကိုနားလည်ခွင့်လွှတ်ပေးရန်လည်း NUG က မေတ္တာရပ်ခံသည်။


နွေဦးတော်လှန်ရေးအတွက် ငွေတိုက်စာချုပ်မှတစ်ဆင့် ဒေါ်လာတစ်ဘီလီယံဖိုးရောင်းချနိုင်ရန် NUG ကစီစဥ်ထားခဲ့ပြီးနောက် နိုဝင်ဘာ ၂၂ ရက်ကစတင်ရောင်းချရာ တစ်ပတ်အတွင် ဒေါ်လာ ၁၅ သန်းရရှိခဲ့သည်။


သို့သော် အကြမ်းဖက်စစ်ကောင်စီဘက်၏ အနှောက်အယှက်များကြောင့် ငွေတိုက်စာချုပ်ရောင်းချမှုကို ဒီဇင်ဘာလကုန်အထိ ခေတ္တရပ်ဆိုင်းခဲ့ရသည်။



ထို့နောက် ပြည်ပ နိုင်ငံများတွင်သာမက ပြည်တွင်း၌ပါ KIO၏ ငွေကြေးပို့ဆောင်ရေးစနစ်မှတစ်ဆင့် ဝယ်ယူနိုင်အောင်ဆောင်ရွက်ခဲ့ပြီးနောက် ၂၀၂၂ ဇန်နဝါရီ ၁ တွင် ပြန်လည်ရောင်းချခဲ့သည်။