ကိုဗစ်ဆေး တင်သွင်းရန် လျှောက်ထားမှုများ ကျန်းမာရေးဝန်ကြီးဌာနတွင်ကြန့်ကြာနေသဖြင့် အာမခံချက်မရှိသော အောက်လမ်းမှ တရားမဝင်ဆေးများသာပြည်သူများသုံးစွဲနေရ


ကိုဗစ်ဆေး တင်သွင်းရန် လျှောက်ထားမှုများ ကျန်းမာရေးဝန်ကြီးဌာနတွင်ကြန့်ကြာနေသဖြင့် အာမခံချက်မရှိသော အောက်လမ်းမှ တရားမဝင်ဆေးများသာပြည်သူများသုံးစွဲနေရ

ကိုဗစ်တတိယလှိုင်းသည် မြန်မာနိုင်ငံသို့ပြင်းထန်စွာ ရိုက်ခတ်နေပြီး ကိုဗစ်ကုသဆေးများပြည်တွင်းသို့ အချိန်မီရောက်ရန် မြန်မာနိုင်ငံကုန်သည်ကြီးများနှင့် စက်မှုလက်မှုလုပ်ငန်းရှင်အသင်း (UMFCCI)၊ ကိုဗစ် ၁၉ ရောဂါကာကွယ်ကုသရေးဆေးနှင့် ဆေးပစ္စည်းများပြည်ပမှတင်သွင်းမှုလွယ်ကူလျင်မြန် မှန်ကန်ချောမွေ့စေရေးလုပ်ငန်းအဖွဲ့ (Task Force) အဖွဲ့များ ဖွဲ့စည်းကာပြည်ပမှကိုဗစ်ကုသဆေးများ ပြည်တွင်းသို့အချိန်မီရောက်ရန်၊အာမခံချက်ရှိသော ဆေးဝါးများဖြစ်ရန်ဆောင်ရွက်လျက်ရှိသည်။


လုပ်ငန်းစဉ်အရ ဆေးတင်သွင်းလိုသည့်ကုမ္ပဏီသည် UMFCCI တွင်လျှောက်ထားရသည်။ UMFCCI က အချိန်မဆိုင်းဘဲ အဆိုပါလျှောက်လွှာကို Task Force ထံပေးပို့ရသည်။ Task Force သည်အဖွဲ့တွင်ပါဝင်သော FDA ကိုယ်စားလှယ်၏ ထောက်ခံချက်ဖြင့်နေပြည်တော် FDA ရုံးချုပ်သို့တင်ပြပြီး ဆေးတစ်ကြိမ်သွင်းခွင့် (One Time Permit) ကို FDA က ၄၈ နာရီအတွင်း ထုတ်ပေးရမည်ဖြစ်သည်။


သို့သော် ထိုသို့တင်ပြထားသော ဆေးသွင်းခွင့်များသည် နေပြည်တော် ကျန်းမာရေးဝန်ကြီးဌာန မှ ခွင့်ပြုချက်မကျဘဲ ရပ်တန့်နေကြောင်းသိရသည်။ ကိုဗစ်ရောဂါ ကူးစက်ခံရသူများအနေဖြင့် အရပ်အခေါ် အသက်ကယ်ဆေး Remdesivir ဆေးများ၊ အရပ်အခေါ်သွေးကျဲဆေးဖြစ်သည့် Enoxaparin ဆေးများစသည့် ကိုဗစ်ဆေးများကို မည်သည့်အာမခံချက်မှမရှိသည့်အောက်လမ်းမှ တရားမဝင်တင်သွင်းသူတို့ထံမှယင်းတို့ပြောသည့်ဈေးဖြင့် အဆမတန်ပေးကာဝယ်ယူသုံးစွဲနေရသည်ကိုတွေ့နေရသည်။ အဆိုပါအောက်လမ်းမှ ဆေးသွင်းသည့်သူများသည် ဂိုဏ်းဖွဲ့ကာ ဘင်္ဂလားဒေရှ့်မှတဆင့်ဧရာဝတီတိုင်းဒေသကြီး ရွှေသောင်ယံဆိပ်ကမ်းသို့ တရားမဝင်စက်လှေများဖြင့် သယ်ဆောင်ခြင်း၊ အင်ဖာ-တမူးလမ်းကြောင်းမှ တရားမဝင်သယ်ဆောင်ခြင်းတို့ဖြင့် ပြည်တွင်းလိုအပ်ချက်အရ တရားမဝင်တင်သွင်းနေကြသည်။ အချို့တရားမဝင်တင်သွင်းသူများဆိုလျှင် One Time Permit ရသည်ဟု ဆိုကာ ဈေးကွက်အတွင်း ဗြောင်လိမ်ရောင်းချလျက်ရှိသည်။


အဆိုပါ မည်သည့်အာမခံချက်မှ မရှိသည့်ဆေးဝါးတင်သွင်းမှုကို ကျန်းမာရေးဝန်ကြီးဌာန အနေဖြင့် မနှိမ်နှင်းနိုင်သလို တရားဝင်တင်သွင်းမည့်သူများကိုလည်း တစ်ကြိမ်တင်သွင်းခွင့်ပါမစ်ချမပေးသည့်အပေါ်မေးခွန်းထုတ်စရာများဖြစ်လာသည်။ ကျန်းမာရေးဝန်ကြီးဌာနသည် စားသုံးသူများကို အရည်အသွေးပြည့်ဝသည့် ပစ္စည်းများသုံးစွဲနိုင်ရန် တာဝန်ယူရသည့်အဖွဲ့အစည်းဖြစ်သော်လည်း ယခုကဲ့သို့ကပ်ရောဂါဖြင့် တွေ့ကြုံချိန်တွင် အရည်အသွေးပြည့်ဆေးများတင်သွင်းမှုအတွက် ဖြေလျော့မှုများမဖြစ်မနေလုပ်ရန်လိုပေသည်။


ဥပမာပြရလျှင်မြန်မာ FDA ထက်များစွာအဆင့်မြင့်သောထိုင်း FDA သည်ပြည်တွင်းထုတ်ဘယဆေးတစ်မျိုးကို ကိုဗစ်ရောဂါကုသရန်ဖြေလျှော့ပေးခဲ့သည်။ ထို့ကြောင့် ကျန်းမာရေးဝန်ကြီးဌာနအနေဖြင့်ကပ်ရောဂါကူးစက်ပြီး ပြည်သူများသေဆုံးနေချိန်တွင် ယခင်အတိုင်းစာအုပ်ကြီးကို ဖက်တွယ်ထားပြီး တရားမဝင်တင်သွင်းနေသူများကိုမျက်နှာလွှဲ ခဲပစ်လုပ်ထားမည်လော၊ တရားဝင်တင်သွင်းရန်လျှောက်ထားသူများကို One Time Permit ထုတ်ပေးပြီး ပြည်သူများအသက်ကိုကယ်တင်မည်လောဆိုသည်မှာ ကျန်းမာရေးဝန်ကြီးဌာန၏ ကိုယ်တိုင်ရေးမည့်သမိုင်းသာလျှင်ဖြစ်ပါတော့မည်။


ကျန်းမာရေးဝန်ကြီးဌာနသည် တိုင်းပြည်လူဦးရေ၊ ရောဂါကူးစက်နှုန်း၊ လိုအပ်သည့် ဆေးဝါးအရေအတွက်ကို ချိန်ထိုးတွက်ချက်ထားမှုရှိပါ၏လားဟု ဤစာမှတဆင့်မေးလိုပါသည်။ လက်ရှိတွင်တော့ကိုဗစ်ကူးစက်နေသောပြည်သူများသည် တရားမဝင်သွင်းလာသောအရည်အသွေးအာမခံချက်မရှိသည့်ဆေးများကို ဈေးကြီးပေးဝယ်ယူသုံးစွဲရင်းနေ့စဉ်ကြွေလွင့်နေရသည်ကို တာဝန်ရှိသူများသိရန်တင်ပြလိုက်ရပါသည်။


ဆေးကြောင့်အခက်တွေ့နေသူတစ်ဦး


#ကိုဗစ်၁၉

#covid19

#ကျန်းမာရေးဝန်ကြီးဌာန

#ministryofhealth

#အသက်ကယ်ဆေး

#သွေးကျဲဆေး

#remdesivir

#enoxaparin

#တရားမဝင်တင်သွင်းမှု

#illegalimport